Na mês pasadu pexeras ku piskadoris na  São Vicente, staba preokupadus ku falta di pexi pamodi mau tempu ki tevi duranti alguns simanas ki impidi piskadoris di bai mar. Dja passa más di um mês y merkadu inda stá parsi longi di toma sê ritmu habitual ku txeu pexis riba pedra, undi ki és falta di pexi tá kontribui pá subida duplikadu di pexi.
Di akordu ku alguns donas di kasa és stá priokupadas ku subida di presu exageradu di pexi.
Armanda Monteiro flá: presu di pexi stá exageradu y um kilu di djeu pá 600$ 00 é Caru dimas em relason a keslotu tipu di pexi ki també é rei di karu.
Maria de Fátima flá má pexi stá karu y má nês momentu si pexi stá ku kel presu li é pá nu tem Kalma ku pasiênsia pamodi má momentus bom tá txiga.
Pá Neves Fonseca, si pexi stá karu tem ki ranjadu otus alternativas sima kumi fijon, galinha, verduras entri otus kuza além di pexi, é flá inda má apesar di tudu kuza sta karu na merkadu devidu a inflason nu tem ki desaraska di kualker manera. Pá otu ladu pexeras flá má pexi stá karu devidu a condisons klimatikus.

Pexera Maria flá má pexi stá karu pamodi kês poku ki piskadoris tá piska és é obrigadu a rabendi pá um presu más karu pés podi trá algum lukru.
Ago si mau tempu kontinua, presu di pexi tá kontinua karu y alguém tem ki kumpra pexi pá presu ki stá na merkadu.

“Notícias do Norte/ DYPK”