Bu atxa má foi num kuartu particular? Nau, pacienti fica internadu na traumatologia dipôs di um cirurgia na odju. Um adolescenti ki sufri violênsia na rua, undi fica ku pancada na odju tevi ki paga 75.562 $00 pá paga servisus di hospital pá um simana di internamentu.
Claru ki kenha ki paga foi pais dês adolescenti, ki fica spantadus y pergunta dundi bem kel valor exageradu pá apenas 7 dia di cama na um di kes kuartus di traumatologia na hospital Agostinho Neto. Pais di adolescenti nem ka recorri a servisus particular na um kuartu indidividual ku tv, ar condicionadu, atendimentu personalizadu y tudu hora.
Tá custa intendi modi ki pá tom pocu tempu di internamentu, sidadon nês casu um comercianti retalhista undi rendimentu ka tá ultrapassa saláriu di um licenciadu tem ki paga txeu si pá cuida di saúde di sê fidju num hospital públiku. Si nu fazi conta é más di 10 contu pá dia.
Bom, si conta di hospital ka stá erradu inton sta na prátika um roubu di mó desarmadu na bolsus di sidadon trabadjador.
Ninhum clinika privadu tá cobra um presu Caru dês manera, o ki tá obriga a ponta dedu pá sistema nacional di saúdi ki Debi permiti acesu à servisus di saúdi pá tudu alguém sem excepson . Si autoridadis sta exibi ekipamentus y más medikus pá estatísticas, falta poi també acessibilidadi. Nu ka sta fala di sentrus di saúdi pertus di hospital más sim custu di saúdi.
Na um país sima dinôs, undi ki desempregu é txeu, saláriu ka tá atualizadu djuntu ku inflason y puder di compra stá frakici tudu dia, kenha ki tá podi paga és kuantia pá trata na hospital central di Praia? Grandi parti di kuadrus superior ka tá ganha 75 contu líquido pá mês, ago imagina um sidadon kum vencimentu mediu ó baxu.

Talvez pamodi keli txeu caboverdianus ku algum puder do compra stá bai pá estrangeiru djobi tratamentu di kualidadi y na presu más convidativu, aliás pais di adolescenti ki paga 75 contu bai continua terapia na Dakar, Senegal undi sabedu má kualidadi é más ki presu.
Enfim ku és servisu di saúdi elitista, país sta condenadu a morri si ka di doensa é di cura.
Sorti dês terra é ki tem txeu jovens, y pamodi keli tem menus infermidadis , si bem ki stá aumenta devidu à maus hábitus na alimentason y cuidadus na prevenson. Horas ki comparadu ku paisis undi média é más altu.

“Cabofree/ DYPK”