Bendederas di Mercado di Platô sta ben muda di local di venda, es sta ba podu bendi la na undi ki sta státua di Amilcar Cabral.
Keli ê um disison di Câmbra Municipal di Praia, pois mercado di Platô sta mesti fazedu obras pa midjora spasu undi ki ta bendedu frutas, verdura, carne ku pexe.
Segundu Cambra, es mudança pa espasu frente undi ki sta statua di Amilcar Cabral ê “temporário”(pa poku tempu) e sta ben fazedu nes mes di Fevereru,antis di cinza.
Administrador executivo di SEPAMP José Moreno, fla ma es mudansa, na verdade, dja tinha ki ser fetu desde dia 10 di Janeru des anu, mas ka kontici pamodi es tevi ki faze obras la na spasu di Memorial Amilcar Cabral pa podi kebi tudu benderas.
Obras pa midjora Mercado di Platô ta custa cerca di 80 mil conto e possivelmente ta sta prontu dentru di seis mes ou seja, na Agosto ou Setembro des anu mercado ta sta prontu e bendederas ta torna volta pa mercado di Platô..
Ten pessoas ki dja komesa reklama pamodi es mudansa, alguns sta fla ma finca fera(mercado) na mesmu espasu ku statua Amilcar Cabral ta suja e ta tapa memorial Amílcar Cabral, otrus sta reclama pamodi sta ba bendedu alimentos na kel local ki ta fica mesmu frente ku um vala di vazamento di esgoto, ki ta bota mau txeru.
Alguns ka sta kontente ku es mudansa, es sta fla, ma ora ki fladu “temporário”, na Cabo Verde ta dura mutu mas di ki tempu ki inicialmente staba previsto.

Segundu jornal A NAÇÃO, alguns membrus di Governo e membros di Associação dos Combatentes da Liberdade e da Pátria (ACOLP) es sta indignado ku possibilidade ma sta ben fincado mercado, em frente di memorial Amílcar Cabral.
Ministro di Cultura fla ma el ê ka fladu nada, ê ka ten konhecimento des mudansa, José Luís Vaz ki ê vice-presidente di ACOLP, mostra ma ê ka sta nada satisfeito ku es mudansa, ê fla ” nu ka ten certeza sobre es mudansa e nu ka foi komunikadu, mas si keli for verdade nu ka ta aceta. Fera di cinza ta dura 1 ou 2 dia, kela inda é aceitavel pa podu na ladu des combatente, “ka ta afecta” imagem di local undi ki sta memorial Amílcar Cabral. Mas, gô, mas tempu di ki kela dja nu ka ta aceta”.