Marley Dias nasce na Philadelphia, è fidju de pai caboverdiano e mae jamaicana. È lança um novu campanha ki txoma #1000BlackGirlBooks

Anu passadu Marley faze um proposta ki acetadu na compania merkanu Disney, undi ki idea des minininha era sirbi kumida na crianças orfao de Ghana. Gosi tambe è lança um novu campanha ki txoma #1000BlackGirlBooks. Keli ten komu objetivu colecta 1000 livrus undi ki personagens principal de historias è meninas negras. Es campanha (#1000BlackGirlBooks) kre recolhe livrus pa faze um ason social.

BookDriveCrop.2e16d0ba.fill-735x490

“N ta spera ma otrus meninas tambe ta faze keli.
N ta da kes livrus ki n ta recebe, e n kre pa pessoas tambe, uza kel ki es ten, pa es da pa otrus alguen e asi pa kria mas projetus de ason social e tambe pa es fazel de um manera divertido, sem xinti ki è um obrigason.”

si ki Marley fla.

Marley Dias tevi idea de komesa es campanha #1000BlackGirlBooks, dipos ki è keixa na si mae, ma dje cansa de lè livrus ki è ta bai busca na blibioteca de si scola, undi ki ta parce ma historias è sempre igual.

“N fla nha mae ma djan cansa de lè so sobre rapazinhus branco e sobre katxor”. Marley fla keli, pamodi na Merca, livrus mas popular pa crianças, è uns tipos de livru, undi ki personagens è kuase sempre sima kes ki è fla.

Marley xplika ma dipos di keixa na si mae, si mae perguntal “Kusè ki bu krè faze pa muda kela?” Marley fla ma è responde, ma è sta ben faze um colecta de livrus, e ma na es livrus ki è ta recolhe, meninas negras è personagem principal de historia.

Ti gosi Marley Dias dja konsigui colecta 400 livru, si objetivu è antis de dia 1 de Fevereru djunta mil livru.
BookDrive2.width-500

Es projetu de Marley sta faze parte de um fundason comunitàrio de Philadelphia, ki ta empodera e ta midjora saude de jovens meninas pobre, de kel cidade.
Mae de Marley ki txoma Janice ki kria es fundason dja ten 7 anu djuntu ku um grupu de alguen.

Janice ki nasce na Jamaica, sta orgulhosa de odja si fidja na faze algum kusa pa sociedade e è fla ma es campanha “#1000BlackGirlBooks ki si filha komesa, è um ”abertura de odju e revelason” ti pa el Janice.

” N ka tinha necessidade de identifikason, pamodi n kria na Jamaica, um paìs de pessoas negros, mas nha filha sta kria na um paìs ki maioria è branco e ki ten so 12.6 porcento de negros. Por isso pa ela, identifikason è um kusa txeu importante … Pa menininhas negras de Merca, è mesmu importante de lè historias ki es ta identifika ku el, ki ta refleti kel ki es ku ses amigus ta kustuma faze”, si ki Janice xplika.

Na fevereru, ora ki es colecta termina, Marley ku Janice, kre kria um guia de referencia, undi ki es ta poi nomes de autores, titulu e pa ki idade ki è, tudu es livrus ki es djunta. E dipos es ta faze doason de tudu livrus na um biblioteca ki ka ten txeu recursos na Jamaica, na terra undi ki Janice nasce, asi pa kria sprìtu de da algum kusa de volta pa ses raìz.

Marley Dias fla ma ora ki è bira grande è kre, ser editora e kria si propi revista, e tambe è kre kontinua na faze ason social pa restu de si vida.

Si bu sta na Merca, bu pode manda ou bai faze doason de livrus na 59 Main St., West Orange, N.J., 07052, Office 322.