15241876_2148244318734665_883305363786940955_n

Wilson e Zidane

 

 

Ku 646 voto dadu pa publiku, Dupla Wilson e Zidane de 21 ku 18 anu, natural de Pedra Badejo e residentes na Somada, ilha de Santiago, é grande vencedores de concurso Do You... Ten Talentu? 2º edison.

 

Segundo edison de konkurso Do You..Ten Talentu?, começa na dia 8 de Janeru. Um total de 15 candidato, alguns de Cabo Verde e otrus de vários países sima, França, Suiça, Portugal e Estados Unidos da America, participa nes evento organizado pa site kriolu Do You... Papia Kriolu? (DYPK-Portal.com), e es concorre pa ganha prémiu gravason de um single e gravason de um videoclipe.
Na dia 15 de janeru por meio de voto de 4 júris, kes 3 videos ku mas pontuason passa pa final de concurso DYTT (Do You.... Ten Talentu?)... Jurados des edison de concurso, foi artistas caboverdianos sima, Willy Semedo, Cesa Branca, Tikai e Bob Mascarenhas.
Conforme total de pontuason ki júris dá, ki passa pa final de DYTT2 , é concorrentes Yukka, Iman Africa e dupla Wilson e Zidane.

Odja na site de concurso www.DoYouTenTalentu.com kantu voto ki cada concorrente ki bai final recebe;
VOTOS DE PUBLIKU: FINAL DYTT 2º EDISON

Antes de nu sabe kenha ki era vencedor des concurso, nu entrevista concorrentes ki staba na final

Wilson e Zidane ki é vencedores des Concurso DYTT2, undi ki es participa ku musica de ses propio autoria ku titulu  ''Sem Ambisom'' es kontanu um poku sobre modi ki es konxi kumpanheru e modi ki es ta vivi atualmente.

Es 2 jovens dja ten 2 anu ta canta djuntu, es konxi kumpanheru na insaio undi Wilson staba na insaia pa bai da show na um lugar y pur coincidência  Zidane staba di passagem, é bai assisti insaio ntom Wilson pidil pe pol corru na um musica, ntom Zidane bai poi corru, es fla ma dentu kel, es repara um harmonia ki sai di ses vozes juntu.
Na otu Show ki Zidane tinha el tambe é txoma Wilson pa poi corru, Wilson aseita, e di lá es dicidi na tenta fazi um dupla ki dja sobrivive, mas ki ti inda es sta na luta djuntu, vencendu y ultrapassando obstáculos.

Dupla Wilson e Zidane dja passa pa vários dificuldades y problemas djuntu, sima canta pa cumida, esplorasom, undi kes ta podu canta pa grupo di pessoas de cedo até tardi apenas pa um almoso y dinheru di carro acompanhado di esperança…

Es fla ma boca sabi inda keli é ka nada, ma djes sufri txeu, ma txeu bes djes deta na papel si super bock (papelon) y as vez na sofá… Na 2 dia, alvezes ta ten 1 dia ki es ka ta cume.
Wilson de 21 anu fla: ''Zidane ki sa studa, ta pensado modi ki é sta dreto, mas ki afinal xeiu fomi…''

Es 2 jovem, fla ma es sta ta canta pa es podi cume, e tambe por causa de speransa kes ta dadu ma es ta bem subresai na mundu de musica.

Es sai de Pedra Badejo, es bai vivi na Somada. Na Somada, dipos di varios lutas y conquistas es 2 jovens, na tenta um novu vida, es fla, ma inda so speransa ki es sa ta alimenta del. Es deseja ser um dupla reconhecido como Rei de ''Cabo Ser''.

''Cabo Ser'' e um novo género musical criado pa es dupla, um mistura di musica de Cabo Verde ku influencia sertaneja (musica brasileiro).
Es 2 jovens ta sunha alto, sima kualker otus artista ses sonhu é ser conxedu ku ses talentu.

 

**Equipa DYPK ta da Wilson ku Zidane PARABÉNS pa es vitória, e como prometidu nu ta das prémiu ki es ganha nes concurso, pa asi brevemente es lança ses propio single e videoclipe.

Um obrigado pa tudu concorrentes e júris ki participa nes concurso e nu ta agradici tudu publiku ki vota e apoia concorrentes..E tambe muito obrigado pa nos parcerus New Cabo Pro e Afro No Palco.

Fika atentu nes 2 super talentosos artistas caboverdianos Wilson e Zidane, ki de certeza ta bem surprendenu cada vez mas. Siguis na redes sociais

'' Sem Ambisom'' - Video vencedor de concurso Do You... Ten Talentu?